دشمن کا بچہ !ایک خط

دشمن کا بچہ !ایک خط !

مصنف : گھمنام !

بخدمت جناب ! میں تو بچہ ہوں مجھے نہیں پتا کہ میں آپ کا کیونکر دشمن بنا ! مجھے یہ بھی نہیں پتا کہ آپ دوست ہوں یا دشمن کیوں کہ میں تو بچہ ہوں ! جناب والا میں یہ پوچھنا چاہتا ہوں کہ دشمن کا بچہ ہونے کے ناطے مجھے داخلہ فارم پر دشمن کا بچہ لکھنا ہو گا کہ نہیں ! کیوں کہ جو مجھے شناختی علامت اب ملی ہے ہو سکتا مجھے آئیندہ نادرا کے کارڈ ، پاسپورٹ وغیرہ پر بھی "دشمن کا بچہ" کے طور اپنی شناخی علامت لکھنی پڑھے! یور ڈیفنسی ایکسی لینسی اگر اپ جغرافیائی طور پر ایک لائن کھینچ دیتے تو مجھے یہ سمجھنے میں آسانی ہوتی کہ آیا میں دشمن کے بچے کے زمرے میں آتا بھی ہوں کہ نہیں ! اس وقت میں ایسی الجھن کا شکار ہوں کہ میں کس کو دوست کا بچہ اور کس کو دشمن کا بچہ سمجھوں تاکہ میں اپنی سطح پر دوست بنا سکوں ، لہذا گزارش یہ کہ اگر آپ ایک ایسا ادارہ قائم کر دیں جہاں سے "دشمن کا بچہ ہونے " کا سرٹیفکیٹ بہ آسانی جاری ہو سکے ! تو میری ایک مشکل حل ہو سکتی ہے .

جناب والا میرے کچھ سوالات اور بھی ہیں جیسا کہ : دشمن کا بچہ ہونے کے ناطے میری فیس کتنی ہو گی ؟ کیا گورنمنٹ دشمن پبلک اسکول ہوں گے یا پھر آرمی دشمن پبلک اسکول ہوں گے؟ داخلہ میرٹ پر ہو گا یا پھر کسی دہشت گرد کی سفارش درکار ہو گی ؟ تعلیمی نصاب کیا ہو گا ؟ یا پھر پاکستان کے روایتی فرق کے ساتھ ہی مجھے پڑھایا جائے گا ؟ چونکہ نہ میں امیر کے زمرے میں آتا ہوں نہ کسی غریب کے-- میرا تو زمرہ ہی الگ " دشمن کا بچہ " اسلئے میں داخلہ لینے سے پہلے ان سوالات کے جوابات بمعہ پروسپکٹو چاہتا ہوں ! اس کے علاوہ میں یہ بھی جاننا چاہتا ہوں کہ بہ حثیت دشمن کا بچہ میرا کیریئر کیا ہو گا ؟ کیا میں کسی گورنمنٹ کے ادارے میں کرپشن کرنے کا اہل ہوں گا ؟ یا پھر کسی پرائیویٹ ادارے میں فراڈ ، اثاثے باہر منتقل کر سکوں گا یا پھر صرف پاکستان میں ہی قبضہ وغیرہ کر سکوں گا ؟ یہ میں اسلئے پوچھ رہا ہوں کہ موجودہ تعلیم نظام سے فارغ التحصیل ملک دوست بچے جب سے پاکستان بنا ہے یہی کچھ تو کر رہے ہیں ! اور اگر کبھی یہ سب کچھ کرتے پکڑے جاؤ تو" دشمن کا بچہ" قرداد پاس کروانے کا اہل ہوں گا یا پھر دھرنا دینا ہو گا ؟ اگر عدالتی نظام میں ایک شق یہ بھی ڈال دی جائے کہ دشمن کے بچے کو الله ہی پوچھے گا تو میں بہت مشکور ہوں گا، کم از کم اس شق سے میں جس احساس کمتری کا شکار ہوں اس کا تھوڑا سا ازالہ ہو جائے گا !

جناب والا اگر " دشمن کا بچہ " کے لئے ایک گنجائش یہ بھی پیدا کر دی جائے جیسا کہ سانحہ ماڈل ٹاؤن ، بلدیہ فیکٹری ، سانحہ قصور اور اس جیسے ملتے جلتے سانحہ مجھ سے سرزد ہو جائیں تو جے آئی ٹی یا پھر کسی کمیشن سے زیادہ کوئی کاروائی نہیں ہو گی. اور ہو سکے تو میری تعلیم کے ساتھ "دشمن کا بچہ استشنیٰ " متعارف کروا دی جائے تو میری تعلیم مکمل ہو جائے گی !

نہ میں سندھی نہ میں بلوچی ،
نہ میں پنجابی نہ میں پٹھان
دشمن کا بچہ ہے میری پیچان

فقط دشمن کا بچہ